உதட்டுச் சுழல்

ஒரு கருவறை
மலையாக உருமாறியபோது
ஊற்றெடுத்து கிளம்பியது
உன் நதி

வழித்தடமெங்கும் விரிந்து பரவிய
வனாந்தரங்களில்
குதித்துக் களித்த மருட்சியில்
உன் கரையில்
கடைசியாக
கால் நனைக்க வந்தவன் நான்

தாகத்தை சாகடிக்க
அள்ளிக் குவித்த என் கைகளிலிருந்து
சொட்டுகிற முத்தங்கள்
நீச்சல் வீரனாக்குகிறதென்னை

இனி
திரும்பலாம்
திரும்பாமலும் போகலாம்
உன் உதட்டுச் சுழலுக்குள்
சிக்கப்போகும் நான்